Námskeiðið felst í þátttöku fjögurra eða fimm laganema í málflutningskeppni Philip C. Jessup þar sem keppt er á ensku í ágreiningi á sviði þjóðaréttar. Um er að ræða stærstu alþjóðlegu málflutningskeppnina í heimi en dómarar í lokakeppninni eru dómarar Alþjóðadómstólsins í Haag (ICJ). Námskeiðinu er skipt upp í tvo hluta, fyrri hlutinn er á haustmisseri en síðari hlutinn á vormisseri. Á haustmisserinu skrifa nemendur greinargerð í sókn og vörn sem er skilað í byrjun janúar til keppnisstjórnar. Á vormisserinu hefst undirbúningur fyrir munnlegan málflutning í sókn og vörn í landskeppni hérlendis eða erlendis, sem fer fram í febrúar, þar sem þátttökuliðin keppast um að komast í lokakeppnina sem fer fram í mars eða apríl í Washington, D.C., í Bandaríkjunum.

Nemandi sem hefur lokið námskeiðinu Jessup málflutningskeppni getur:
Þekking:
• útskýrt helstu hugtök á sviði þjóðaréttar sem varða álitaefnið í málsatvikalýsingu,
• útskýrt helstu efnisreglur þjóðaréttar sem varðaálitaefnið í málsatvikalýsingu,
• gert grein fyrir mikilvægustu úrlausnum á sviði þjóðaréttar sem varðar álitaefnið í málsatvikalýsingu,
• gert grein fyrir réttarfari og réttarheimildarfræði Alþjóðadómstólsins í Haag (ICJ)
Leikni:
• leyst með viðurkenndri aðferðarfræði lögfræðinnar, og á grundvelli viðurkenndra heimilda og hugtaka þjóðaréttar, úr álitaefnum í málsatvikalýsingu.
Hæfni:
• greint lagaleg álitaefni í málsatvikalýsingu hverju sinni á sviði þjóðaréttar,
• flutt mál í sókn eða vörn skriflega á ensku þar sem reglur þjóðaréttar eru heimfærðar upp á málsatvikalýsingu hverju sinni á faglegan, markvissan og skýran hátt,
• flutt mál í sókn eða vörn munnlega á ensku þar sem reglur þjóðaréttar eru heimfærðar upp á málsatvikalýsingu hverju sinni á faglegan, markvissan og skýran hátt.