Meistaranám í talmeinafræði er 120 eininga þverfræðilegt framhaldsnám og þar af skal rannsóknarverkefni vera 30 e. Rannsóknarverkefnið er unnið á öðru, þriðja og fjórða misseri námsins.

Vor (2. önn): Við lok þessarar annar á nemandi að koma með hugmynd að meistaraverkefni sínu, finna leiðbeinanda og hefja gagnaleit.

Haust (3. önn): Á þessu misseri móta nemendur rannsóknarviðfangsefni sitt og rannsóknarspurningar og leggja fram áætlun um rannsóknina til samþykktar af fagráði kennara talmeinafræðinnar. Nemendur skulu enn fremur ljúka vinnu á fræðilegum bakgrunni verkefnisins á þessari önn og sjá um að senda umsóknir til viðeigandi aðila ef þörf krefur, t.d. Vísindasiðanefndar Íslands, Vísindasiðanefndar HÍ eða Siðanefndar Landspítalans, eftir því sem við á (2e). Námsmat: Staðið/fallið.

Vor (4. önn): Vinnu við lokaverkefnið lýkur á þessari síðustu önn námsins með meistaravörn í lok annar (28e). Námsmat: Staðið/fallið.

Markmið meistaraverkefnis er að:

• nemandi öðlist þekkingu og skilning á fjölbreyttum rannsóknaraðferðum í talmeinafræði
• nemandi geti skrifað rannsóknaráætlun og viðeigandi leyfisumsóknir sé þess þörf
• nemandi geti átt frumkvæði að eigin rannsókn, unnið sjálfstæða rannsóknarvinnu og skýrt markmið og niðurstöður rannsóknarinnar fyrir fólki innan og utan fræðasviðsins
• nemandi geti nýtt sér upplýsingatækni, þar á meðal notkun fræðilegra gagnagrunna, sérhæfðan rannsóknarhugbúnað og fjölbreyttar upplýsingalindir.